Семейдегі полиция бөлімінің алдында, тапа-тал түсте үш жігіт бір ер адамды жабылып тепкілеп, пышаққа ұқсас затпен бірнеше рет ұрып кетті. Осы оқиғаға қатысы болуы мүмкін екі күдікті дереу ұсталып, уақытша ұстау изоляторына қамалды. Үшінші адам іздестіріліп жатыр, деп хабарлайды F16.kz.
Оқиға күндіз, адамдар ары-бері жүріп жатқан көшенің ортасында, орталық полиция бөлімінен бірнеше метр жерде болған. Зіңгіттей үш азамат жерде құлап жатқан бір жігітті аяусыз тепкілеп, ол аздай біреуі пышаққа ұқсас затпен ұрғаны куәгерлер түсірген бейнежазбадан көрінеді. Бейнежазба әлеуметтік желілерде жарияланды. Желі қолданушылары бұл жағдайды қызу талқылап, қатыгездікті сынады.
Полицияның хабарлауынша, күдіктілердің екеуі ұсталып, қамауға алынған.
Аталған оқиға бойынша қылмыстық іс қозғалды. Жүргізілген жедел іс-шаралардың нәтижесінде екі күдікті ұсталып, уақытша ұстау изоляторына қамалды. Тағы бір адамның қайда екені анықталып жатыр. Алдын ала мәліметтер бойынша, төбелес жеке бас араздықтан туындаған. Қылмыстық-процестік кодекстің 201-бабына сәйкес, сотқа дейінгі тергеп-тексеруге қатысты басқа ақпарат жария етуге жатпайды, — деп хабарлады Абай облысының полиция департаменті.
