Өскеменнің Ольга Рыпакова атындағы жеңіл атлетика орталығында Шығыс Қазақстан облысының XXIII халықтық спорт ойындарының жабылу рәсімі өтті. Конституциясының 30 жылдығына және Спорт күніне орай ұйымдастырылған салтанатты шараға облыс әкімі Нұрымбет Сақтағанов қатысты, деп хабарлайды F16.kz.
Араға жеті жыл салып қайта оралған бұл спорт мерекесі биыл екі кезеңге бөлініп өткізілді. Ұлттық спорт түрлерінен ұйымдастырылған бірінші кезең 9-14 маусым аралығында Катонқарағай ауданында болды. Төр Алтайдың төсінде дүркіреп өткен ойындарда өңірдің аудан-қалаларынан жиылған қатысушылар көкпар, бәйге, аударыспақ, теңге алу, қазақ күресі сынды сайыстарда бақ сынады.
Екінші кезең 11-16 тамыз аралығында Өскеменде өтті. Онда сайыскерлер спорттың 13 түрінен, атап айтқанда футбол, волейбол, үстел теннисі, президенттік көпсайыс, жеңіл атлетика, шахмат, дойбы, тоғызқұмалақ, қол күресі, арқан тарту, гір көтеру, асық ату және садақ ату сияқты спорт түрлерінен «кім мықтыны» анықтады.
Аймақ басшысы халықтық ойындардың бұқаралық спортты дамытуға, денешынықтыруды насихаттауға, ұлттық дәстүрді сақтауға, салауатты өмір салтын қалыптастыруға, сондай-ақ өңір тұрғындарының бірлігін нығайтуға қосар үлесі зор екенін атап өтті.
Спорт қай кезде де адамдарды біріктіріп келеді. Бүгін біз ұлттық ойындар мен заманауи спорт түрлерінің қатар дамып, мықты әрі дені сау ұрпақты тәрбиелеп жатқанын көріп отырмыз. Мұндай бастамаларды қолдау біз үшін өте маңызды. Өйткені дәл бұқаралық спортта бәсекелестік рухы, достық пен патриотизм қалыптасады, – деді Нұрымбет Сақтағанов.
Облыс орталығында өткен халықтық ойындардың екінші кезеңіне аймақтың қала-аудандарынан келген 13 команда, жалпы саны 1500-ден астам саңлақ қатысты.
Халықтық ойындардың қорысындысына сәйкес, өңірдің үздік спортшылары мен командалары анықталып, жеңімпаздар мен жүлдегерлер лайықты марапаттарға ие болды. Жалпыкомандалық есепте біріші орынды Өскемен қаласы иеленсе, екінші орын Тарбағатай ауданына бұйырды. Үшінші орынға Глубокое ауданы табан тіреді.
