Үржар ауданының Бестерек ауылында жол-көлік оқиғасынан зардап шеккен балаларды бүгін ұшақпен Астанаға жеткізеді. Бұл туралы Денсаулық сақтау басқармасынан мәлім етті, деп хабарлайды F16.kz.
Зардап шеккен барлық баланың жағдайы ауыр. Президент тапсырмасымен Үржарға Қорғаныс министрлігінің әскери-көлік ұшағымен нейрохирург, травматолог және реаниматолог мамандарынан құралған арнайы бригада жеткізілді. Ауруханаға түскен балаларда бас-сүйек ми жарақаттары, ішкі ағзалардың зақымдануы және тірек-қимыл жүйесінің жарақаттары анықталды. Қазір бір баланың миына күрделі нейрохирургиялық операция жасалып жатыр, – деп хабарлады Денсаулық сақтау министрлігі.
Ведомствоның ақпаратына сүйенсек, зардап шеккен балаларды медициналық тексеруден өткізіп, тиісті ем-дом көрсету үшін бүгін Астанаға ұшақпен жеткізу жоспарланған. Алайда аудандық аурухана мамандарының айтуынша, бір қыз бала жолды көтере алмауы мүмкін, сондықтан ол әзірге жансақтау бөлімінде болады.
Бұған дейін жазғанымыздай, 19 тамызда кешкі сағат 16.00 шамасында Үржар ауданының Бестерек ауылында 55 жастағы Toyota Camry көлігінің жүргізушісі рөлге ие бола алмай қалып, үй маңында ойнап жүрген бір топ баланы басып кеткен. Жол-көлік оқиғасы салдарынан екі, үш және бес жастағы балалар мерт болды. Тағы үш бала түрлі ауыр дене жарақатымен Үржар аудандық ауруханасына жеткізілді.
Ауыл тұрғындарының айтуына қарағанда, бірнеше баланың өмірін қиған жол-көлік оқиғасына себепші жүргізуші бұрыннан эпилепсиямен ауырады. Ол көлікпен келе жатқанда ұстамасы ұстап, рөлге ие бола алмай қалуы мүмкін деген болжам айтылып жатыр.
