Абай облысының Бестерек ауылында болған жол көлік оқиғасынан бірнеше бала мерт болды, деп хабарлайды F16.kz.
Куәгерлердің айтуынша, 19 тамыз күні кешкі сағат 16.00 шамасында Үржар ауданының Бестерек ауылында 55 жастағы жүргізуші Toyota көлігін басқара алмай, үйдің маңында жүрген балаларды қағып кеткен. Соның салдарынан екі бала оқиға орнында көз жұмды, тағы біреуі жедел жәрдем көлігінде қайтыс болды. Тағы үш бала ауыр жарақатпен ауруханаға жеткізілді. Дәрігерлер олардың жағдайын өте ауыр деп хабарлады.
Жол-көлік оқиғасы бойынша полиция сотқа дейінгі тергеу бастады. Жүргізуші уақытша ұстау изоляторына қамалды, ол оқиға кезінде мас күйде болмаған. Қазір тергеу әрекеттері жүргізілуде. Полиция жүргізушілерге жол қозғалысы ережелерін қатаң сақтап, әсіресе тұрғын үй маңында және балалар көп жүретін жерлерде барынша мұқият болуға шақырады, – деп хабарлады Абай облыстық полиция департаменті бастығының орынбасары Ернар Базаров.
Денсаулық сақтау министрлігінің мәліметінше, Президент тапсырмасымен жол-көлік оқиғасынан зардап шеккен балаларға медициналық көмек көрсету үшін кеше кешке Үржар ауданына Қорғаныс министрлігінің әскери-көлік авиациясына тиесілі С-295 ұшағы медициналық бригадамен бірге ұшып келді. Бригада құрамында реаниматолог, нейрохирург және травматолог бар.
Қайғылы жағдайға байланысты оқиға орнында арнайы топ жұмыс істеп жатыр. Аудан әкімі Ақылбек Башимбаев қара жамылған отбасыларға барып көңіл айтып, барлық қажетті көмек көрсетілетінін жеткізді.
Облыс әкімдігі тарапынан қайтыс болған балаларды соңғы сапарға шығарып салу рәсімдерін ұйымдастыруға, ата-аналарына психологиялық және метариалдық тұрғыдан толықтай қолдау көрсетіледі.
