ШҚО-да колонияға ірі көлемдегі есірткі жеткізу әрекетінің жолы кесілді, деп хабарлайды F16.kz тілшісі Polisia.kz сайтына сілтеме жасап.
Жақында ғана шартты түрде мерзімінен бұрын босап шыққан 26 жастағы рецидивист Шемонаиха ауданындағы түзеу мекемесінің қоршауынан пакет лақтырмақ болған. Тек колония қызметкерлері мен Ұлттық ұлан сарбаздарының жедел әрекетінің арқасында қылмыстың жолы кесілді.
– Кинологиялық ит бірден пакеттер болуы мүмкін жерді көрсетіп, қылмыс орнынан қашпақ болған «курьердің» ізіне түсті. Ерекше назар аударған жайт: есірткі салынған пакеттер скотчпен және электродтармен оралған, – деп жазады дерек көзі.
Ұсталған азаматтың айтуынша, электродтар жіберілген сәлемдеменің қай жерге түсетінін көруге көмектесуі керек болған, сонда ол шөп пен бұталардың арасында жоғалып кетпес еді. Алайда, оның тапқырлығына қарамастан, жоспары іске аспады. Сараптама алынған заттың салмағы 600 грамнан асатын кептірілген марихуана есірткісі екенін растады.
– Мекеме периметріне тыйым салынған заттарды тасымалдау әрекеттері қатаң түрде тоқтатылады, колония қызметкерлері мен қосымша күштер бұл бағытта үздіксіз қызмет атқарады. Біз бір апта ішінде ірі көлемдегі есірткіні жеткізудің екінші әрекетінің жолын кестік, – деді ҚР Ішкі істер министрлігінің Қылмыстық-атқару жүйесі комитеті №18 мекемесінің бастығы Қуаныш Қонжанов.
Ұсталған «курьер» Шемонаиха ауданының уақытша ұстау изоляторына қамалды. Оған қатысты аса ірі мөлшерде есірткіні заңсыз өткізу туралы бап бойынша сотқа дейінгі тергеу басталды.
