Жыл басынан бері Шығыс Қазақстан облысының 16 ауылына интернет желісі тартылды. Сөйтіп өңірдегі ғаламторға қосылған елді мекендер саны 234-ке жетті, оның ішінде алты қала және 226 ауыл бар. Бұл облыс халқының 97,1%-ы, деп хабарлайды F16.kz.
ШҚО цифрландыру және архивтер басқармасының мәліметінше, жыл соңына дейін тағы 57 елді мекен интернет желісіне қосылады. Қазіргі уақытта бюджет есебінен орнатылған антенна-мачта құрылғыларын мобильді интернетке қосу жұмыстары қолға алынды.
Халық саны аз қалған 66 ауылға 2027 жылдың соңына дейін интернет тартылады.
Сонымен қатар көлік жолдарының бойында 22 антенна-мачта құрылғысын орнату жоспарланған.
Алдағы уақытта облыста 188 әлеуметтік маңызы бар нысанды ғаламторға қосу көзделген. «Қолжетімді интернет» бағдарламасы аясындағы жобалар мен іс-шаралардың жүзеге асырылуы өңір халқын жоғары жылдамдықты әрі тұрақты интернетпен толық қамтуға мүмкіндік береді. Бұл өз кезегінде цифрлық сервистердің дамуына, халықтың өмір сүру сапасының артуына және Мемлекет басшысы жүктеген міндеттердің орындалуына ықпал етеді, – деп атап өтті облыс әкімі Нұрымбет Сақтағанов.
Айта кету керек, интернетке қосылу үшін ADSL, FTTH, 3G және 4G сияқты әртүрлі технологиялар қолданылады.
