Өзбекстан астанасы Ташкентте Kyokushin-Ryu кarate федерациясының 4 жастан 18 жасқа дейінгі жас санаттары мен 45+ ардагерлері арасында Азия чемпионаты өтті. Сары құрлықтың түкпір-түкпірінен 10-ға жуық елдің кіл мықтылары қатысқан бәсекеде Қазақстан намысын қорғаған шемонаихалық Глеб Корнеев чемпион атанды, деп хабарлайды F16.kz.
Ол Азия біріншілігенде 30 кг дейінгі салмақ дәрежесінде (6-7 жас арылығы) өнер көрсетті. Нәтижесінде Глеб барлық қарсыластарын айқын басымдықпен жеңіп, алтын медальға ие болды.
Ташкентте жалауы желбіреген Азия чемпионатына жиыны 600-ге жуық спортшы қатысқанын айта кеткен абзал.
Дүбірлі дода аяқталған соң Қазақстан құрамасының өкілдері Ташкенттің мәдени-тарихи жерлеріне саяхат жасап, қаланың көрікті жерлерін аралады. Өзбектің әйгілі асханасынан дәм татып, Диснейлендте уақыт өткізді.
Глеб Корнев – Шемонаиха қаласының тұрғыны, білікті бапкер Александр Черныхтың шәкірті.
Кейінгі 10-15 жылда Шемонаиха ауданында жекпе-жек спорты жақсы дамып келеді. Әсіресе, жастар арасында каратеге қызығушылық жоғары. Қалада жаттығу залдары тұрақты жұмыс істейді. Балалардың жаттығуына барлық жағдай жасалған. Бапкерлер құрамы да сақадай-сай жасақталған. Бұл жұмыс бүгінде жемісін беріп жатыр. Оның жарқын мысалы ретінде Азия чемпионы атанған Глеб Корнеевтің жеңісін атауға болады.
