Елімізде мемлекеттік органдар отандық Aitu мессенджеріне көшіп жатыр. Осыған байланысты халық арасында WhatsApp, Telegram және басқа да шетелдік мессенджерлерді қолдануға тыйым салынатыны туралы ақпарат тарады. Цифрлық даму министрлігі бұл ақпаратты жоққа шығарды, деп хабарлайды F16.kz.
Aitu мессенджерін енгізу бастамасы тек орталық және жергілікті мемлекеттік органдарға, сондай-ақ квазимемлекеттік сектор ұйымдарына қызметтік коммуникация үшін ұсынылады.
Ол мемлекеттік қызметкерлер тек жұмыс барысында пайдаланатын ақпаратпен қауіпсіз алмасуды қамтамасыз ету мақсатында қолданылады. Мақсаты – ақпараттық қауіпсіздік деңгейін арттыру және қорғалған цифрлық ортаға көшу. Aitu қызметтік хат алмасудың, жұмыс чаттарының, жедел хабарламалардың және мемлекеттік цифрлық платформалармен өзара әрекеттесудің негізгі құралына айналады. Оның басты артықшылығы – барлық серверлер Қазақстан аумағында орналасқан, бұл деректерді қорғау талаптарына сәйкес келеді және жүйені мемлекеттік органдар үшін сенімдірек етеді, — делінген министрлік хабарламасында.
Яғни, Aitu шетелдік мессенджерлерді алмастырмайды және оған кедергісі жоқ. Ол тек мемлекеттік сектордағы жұмыс процестері үшін қорғалған арнаны қамтамасыз етеді.
