ШҚО полицейлері мен құтқарушылар жоғалған саңырауқұлақ терушілерді іздеп тапты, деп хабарлайды F16.kz тілшісі Polisia.kz сайтына сілтеме жасап.
«112» қызметіне Риддер қаласының маңындағы «Березовая грива» орман алқабында адамдардың жоғалғаны туралы хабар түскен. Белгілі болғандай, орманға саңырауқұлақ теруге барған үш адам – 62 және 41 жастағы екі әйел мен 9 жастағы қыз бала белгіленген уақытта туыстарымен кездесетін жерге оралмаған.
Оқиға орнына бірден Полиция департаменті мен Төтенше жағдайлар департаментінің қызметкерлерінен құралған іздестіру тобы жіберілді. Жұмысқа бірнеше жаяу топ, арнайы автокөлік пен ұшқышсыз ұшу аппараты тартылды.
Жедел қолға алынған іздестіру шараларының нәтижесінде көп ұзамай жоғалған азаматтар табылды. Олардың жағдайы қанағаттанарлық, медициналық көмек қажет болмады. Әйелдер мен бала туыстарына тапсырылды.
Полиция азаматтарға орманға шыққанда қауіпсіздік ережелерін сақтауды, жолға шығар алдында жақындарға сапардың бағыты бен оралу уақытын хабарлауды, көзге бірден түсетін ашық түсті киім киюді, өзімен бірге толық қуатталған телефон, су және азық-түлік алу керек екенін ескертеді.
– Тек таныс жолмен жүріңіз, бейтаныс бағыттарға бармаңыз. Әсіресе балалармен жалғыз серуендеуден аулақ болыңыз, – деп ескертеді мамандар.
