Биыл еліміздің басты құқықтық құжаты – Конституцияның қабылданғанына 30 жыл. Мерейлі мерекеге орай «Ата заң – Тәуелсіздіктің тірегі» ұлттық іс-шаралар жоспарын іске асыру аясында ШҚО-да бірқатар іс-шара жоспарланған, деп хабарлайды F16.kz.
Айта кетейік, тамыз айының соңында өскемендіктер Конституция күнімен қатар Қала күні мерекесін де атап өтеді. Сондықтан Шығыстың бас шаһарында мереке кең көлемде тойланады.
24 тамыздан 2 қыркүйекке дейін Ата заңымыздың 30 жылдығы мен Қала күніне арналған 30-дан астам шара өткізу жоспарланған. Одан бөлек шаһар көшелері безендіріліп, баннерлер мен ту ілінді. Интерактивті акциялар, «Ата заңды білейік» блиц-сауалнамасы, құқық тақырыбындағы лекциялар, буклеттер тарату жұмыстары да жүргізіліп жатыр, — деп атап өтті Өскемен қаласы әкімінің орынбасары Ирина Смит.
Қаладағы негізгі шаралар 30 тамызға жоспарланған. Республика алаңында «Өскемен батыры» мықтылар шоуы мен «Дәмді Fest» гастрономиялық фестивалі, жәрмеңкелер ұйымдастырылып, қазақ эстрадасының жарық жұлдыздарының қатысуымен мерекелік концерт өтеді.
Әр ауданда іс-шаралар мен викториналар, дөңгелек үстел мен флешмобтар ұйымдастырылып жатыр. Сондай-ақ жаңа әлеуметтік нысандар есігін айқара ашып, қолданысқа беріледі, Бір қабатты Шығыс» бағдарламасы бойынша жаңа үйлердің кілті табысталды, — деді ШҚО ішкі саясат басқармасы басшысының орынбасары Альмира Жұмабаева.
Мерекелік іс-шаралар қыркүйекте де жалғасады. Мектеп оқушылары мен студенттерге арналған құқықтық сауаттылықты арттыруға бағытталған ғылыми-ағартушылық және мәдени шаралар жоспарланған.
