Мемлекет басшысы Қасым-Жомарт Тоқаев мүгедектігі бар жандар үшін инклюзивті орта құру және сандық үлгідегі технологияны үйрету бағытында бірқатар тапсырма берген. Осы жұмыстарға үн қосу мақсатында Өскеменнің Оралхан Бөкей атындағы орталық кітапханасында «TехноSHEBER» 3D баспасы инклюзивті орталығы ашылды, деп хабарлайды F16.kz.
«TехноSHEBER» жобасы ерекше қажеттігі бар балаларға 3D модельдеу, бағдарламалау және басып шығару жүйесін үйрету мақсатында жүзеге асырылып отыр. Орталыққа келген балалар бағдарламалаудан бастап 3D бұйымдарды жасауға дейінгі кезеңдерді меңгеріп шығады. Ары қарай осы салада жұмысқа орналасуға да үлкен мүмкіндіктер ашылады. Нақтырақ айтқанда, осы бұйымдарды онлайн жасау қызметін ұсынып немесе сата алады. Кітапхана өкілдері мүмкіндігі шектеулі балаларға ғана емес, барлық балаларға қай кезде де есігі ашық екенін айтады.
Кітапханамызда инженерия, жаңа технология саласына қызығушылықты арттыратын екі жобаны ұсынып отырмыз «TехноSHEBER» жобасы шығармашылық креатив пен интеллектуалды біліктілікті дамытуға, жаңа технологияны үйретуге бағытталған. Мұнда келушілер 3D принтермен жұмыс істеп үйреніп, өз жобаларын жасай алады. Екінші жобамыз мультистудия деп аталады. Балалар анимациялық жүйені, мультфильмдер жасауды меңгереді. Ең бастысы – мұның барлығы тегін, – деді кітапхананың бұқарамен жұмыс бөлімінің меңгерушісі Руслан Бабиров.
Айта кету керек, кітапхананың кезекті жаңа жобасы бойынша заманауи технология сатып алу Өскемен қаласы әкімдігінің қаржылай қолдауымен жүзеге асырылды.
Дана Әбдікәрім
