ШҚО-да оқушылардың ас мәзірі қайта жасалады. Оған асхананы жалға алған кәсіпкерлердің наразылығы себеп болды, деп хабарлайды F16.kz.
Жалға алушылар жаңа оқу жылына бекітілген төрт апталық мәзірге наразылықтарын білдіріп, облыстық Кәсіпкерлер палатасына арызданған. Бүгін прокуратура, денсаулық сақтау және білім басқармалары өкілдері, санитарлық қызметкерлердің қатысуымен кездесу өтті.
Денсаулық сақтау министрлігінің міндеті — балалар рационын әртараптандыру. Біз оны жақсы түсінеміз. Бірақ шындығында, балалар асқабақ пюресін, брокколи жемейді. Оны тәжірибеде де көргенбіз. Ақша далаға кетеді, бала аш қалады. Сондай-ақ мәзірде аллергия тудыруы мүмкін өнімдер, мәселен мандарин, құрма, шикі пияз бар, — дейді кәсіпкерлер.
Шағымданудың тағы бір себебі – экономикалық қиындықтар. Яғни, норматив бір оқушыға 722 теңге деп белгіленген. Ал, тамақтың өзіндік құны одан жоғары. Есеп бойынша, қаражаттың шамамен 85%-ы өнім сатып алуға жұмсалса, қалғаны еңбекақы, жалға алу және коммуналдық шығындарға жетпейді.
Басқарма мәзірді тек министрлік бекіткен құжат негізінде қабылдады. Біз оны түзете алмаймыз, — деді облыстық денсаулық сақтау басқармасы басшысының орынбасары міндетін атқарушы Айжан Қомшабаева.
Прокуратура анықталған жағдай кәсіпкерлер мен балалардың құқықтарын бұзуы мүмкін екенін атап өтті.
Нәтижесінде, мәселені шешу үшін арнайы жұмыс тобы құрылды. Оның құрамына кәсіпкерлер, білім және денсаулық сақтау басқармасының өкілдері, санитарлық қызметкерлер мен ата-аналар кірді. Жұмыс тобы 10 күн ішінде мәзірді қайта қарап, өзгерістер енгізуі тиіс.
Оған дейін мектеп асханаларында бұрынғы мәзір болады.
