Шемонаиха ауданы әкімдігінің өкілдері Конституция күні қарсаңында «Үміт» балалар үйінің тәрбиеленушілерімен кездесіп, жергілікті өндірушілердің өнімдерінен жасақталған азық-түлік себеттерін табыстады, деп хабарлайды F16.kz.
Қазіргі күні балалар үйінің тәрбиеленушілері Нижние Таинты ауылындағы «Царская Долина» балалар лагерінде. «Мейірім» акциясы аясында әкімдік өкілдері кездесу өткізіп, Мәдениет үйінің қызметкерлері концерттік бағдарлама ұсынды.
Балалармен Ата Заңымыздың маңызы, еңбек нарығында сұранысқа ие мамандықтар туралы әңгіме жүргіздік. Ел Президентінің Жарлығымен 2025 жыл Жұмысшы мамандықтар жылы болып жарияланған. Осы орайда жастардың болашағын айқындайтын ерте кәсіби бағдарлау мәселесінің маңыздылығына да ерекше тоқталдық, — дейді әкімдік өкілдері.
Іс-шара соңында Шемонаиха ауданы атынан балаларға нан өнімдері, бал, жармалар, макарон өнімдері, күнбағыс майы және аудан аумағында өндірілетін өзге де тағам салынған азық-түлік себеттері табысталды.
Сондай-ақ 50 жылдық еңбек өтілі бар «Үміт» орталығының директоры аудан әкімі атынан Алғыс хат пен естелік сыйлықпен марапатталды.
