Өскемендіктердің сүйікті мерекесіне айналған White Party – Oskemen Qalaysyn! кеші биыл да жалғасын тапты. Бұл күні ерке Ертістің жағасындағы амфитеатр әдеттегідей аппақ түске малынды. Кешке келген жұрттың киген киімдері ғана ақ емес, көңілдері да қардай екені байқалды. Бірін-бірі құттықтап, ақжарма тілегін ақтарып, арқа-жарқа болған көпшілік Конституцияның 30 жылдығы мен Қала күніне орай ұйымдастырылған кезекті мерекені жоғары деңгейде атап өтті, деп хабарлайды F16.kz.
Осымен төртінші жыл қатарынан өткізілген бұл кештің жылдан-жылға ауқымы кеңейіп келеді. Форматы да өзгеріп, жаңашылдықтар енгізіліп отырады. Бірақ өзгермейтін бір дүние бар, ол – ақ түс. Мерекеге келгендердің бәрі ақ түсті киім киюі керек. Ережені өскемендіктер жақсы біледі және бұлжытпай орындайды. Биыл да сол әдеттен айныған жоқ ешкім.
Өскеменде қос мереке қатар тойланатыны белгілі. Бұл күндері шаһарда түрлі шаралар болып жатады. Соның ішінде ерекше кеш болсын, жақсы көңіл күймен қарсы алсын деген ниетте осы шараны ұйымдастырамыз. Мұнда ақ түсті ерекше киіммен келген жанға сыйлықтар табыстап, ән айтып, би билейміз. Сондай-ақ өте еркін форматта өтетіндіктен де көптің көңілінен шығады деп ойлаймын, — деді кештің ұйымдастырушысы әрі жүргізушісі Әлібек Досумбаев.
Амфитеатр аумағында шамамен 20-ға жуық интерактивті аймақ жұмыс істеп тұр. Олардың қатарында фотоаймақ, сурет салу аймағы, батут, тетрис, «теңіз шайқасы» және тағы басқалары бар.
Әлеуметтік желіден хабарландыру көріп, ақ түсті киіммен бүгінгі шараға келдік. Шара барлық буын өкілдеріне ыңғайлы ұйымдастырылған. Қызықты ойындар ойнап, бір сергіп қалдық. Қалада тойланып жатқан қос мереке құтты болсын! — деді қала тұрғыны Назигүл Амантаева.
Конституция күні мен Қала күнін мерекелеу әлі де жалғасады. Бүгін кешке қазақ эстрада жұлдыздарының қатысуымен мерекелік концерт өтеді.
