Бүгін Шығыс Қазақстан облысының әкімі Нұрымбет Сақтағанов жұмыс сапарымен Риддер қаласына барып, жылу электр орталығында болды, деп хабарлайды F16.kz.
Биыл жылу орталығын күрделі жөндеуден өткізуге облыстық бюджеттен 1,5 млрд теңге, Үкімет резервінен 5,6 млрд теңге бөлінді. Бұған қоса «ШығысЖылу» АҚ Риддер филиалына отын сатып алуға 1,6 млрд теңге берілді.
Кәсіпорын басшылығының мәліметінше, төрт қазан агрегаты күрделі жөндеуден өтті, олардың екеуі қазірдің өзінде жұмыс істеп тұр. Көмір беру тракты толық жөнделді, екі турбинаның біреуі қазір істеп тұр, екіншісінде жұмыс аяқталуға жақын. Жалпы ұзындығы 6 шақырымнан асатын 23 учаскеде жылу желілеріне жөндеу жүргізіліп жатыр.
Станцияда 20 күндік отын қоры жасақталған, басшылық «Қаражыра» кен орнымен көмір жеткізуге келісімшартқа отырды. Жақында Риддер ЖЭО жылыту маусымына дайындық төлқұжатын алады.
Облыс әкімі бұл нысанның ерекше бақылауда екенін атап өтті.
Жіңішкерген тұстан үзіледі. Сол себепті 2022 жылғы жағдайдың қайталанбауы үшін барлық қажетті жұмысты уақтылы орындап, олқылыққа жол бермеу қажет, — деді Нұрымбет Сақтағанов.
