Бүгін Риддер қаласында 600 орындық жаңа мектеп оқушыларға есігін айқара ашты. Кеншілер шаһарына жұмыс сапарымен барған облыс әкімі Нұрымбет Сақтағанов «Келешек мектептері» ұлттық жобасы аясында салынған білім ордасының ашылу рәсіміне қатысты, деп хабарлайды F16.kz.
Мұндай мектептердің салынуы — болашаққа салынған инвестиция. Біз үшін балалардың жайлы әрі қауіпсіз жағдайда білім алуы, ал мұғалімдердің сапалы жұмыс істеуіне барлық мүмкіндіктердің болуы өте маңызды. Бұл — қаланың және өңірдің дамуына негіз, — деп атап өтті аймақ басшысы.
«AN Groups» компаниясы салған жаңа мектеп қазіргі заманғы білім беру стандарттарына толық сәйкес келеді. Оқу бөлмелері кең әрі жарық, арнайы пәндік кабинеттер, акт және спорт залдары жабдықталған, сондай-ақ цифрлық оқытуға қажетті барлық техника орнатылған.
Бізде мұндай көлемде жабдықтар бұрын-соңды болмаған, бұл шын мәнінде «болашақтың мектебі», – деді оқу орнының ұстаздары.
Ата-аналар мен мұғалімдер бұл оқиғаны ұзақ күткенін айтады. Енді жүздеген бала жайлы жерде алаңсыз білім алып, өнермен, шығармашылықпен, спортпен айналысады. Бұл мектеп оқу орны ғана емес, мәдени өмірдің де орталығына айналмақ.
Мұндай керемет мектепте сабақ оқымау немесе үй тапсырмасын орындамау ұят, – деді оқушылар.
Айта кетейік, биыл жаңа мектептің табалдырығын аттаған 30-дан астам бала алғаш рет партаға отырады.
Риддерде жаңа білім беру мекемесінің ашылуы — білім сапасын арттыру мен өсіп келе жатқан ұрпаққа тең мүмкіндік жасау жолындағы маңызды қадам.
