Риддер қаласының маңында аюлар көбейді. Олардың еркінсіп кеткені соншалық елді мекенді аралап, үйлердің ауласына кіріп жүр. Жақында саяжайлардың бірінің аумағында өсіп қалған үш қонжық бейнежазбаға түсіп қалды, деп хабарлайды F16.kz.
Бұған дейін аюлар бір үйдің қоршауын қиратып, ауласына кіріп кеткен. Осы жолы саяжай ішінде “саяхат” жасауға шыққан сыңайлы.
Бұл бейнежазбаны саяжайдың WhatsАpp тобынан көрдім. Үп-үлкен боп өсіп қалған үш қонжық еш алаңсыз жүр. Оның алдында аюлардың тұрғын аумаққа кіріп, бір үйдің қоршауын қиратып кеткені туралы естігенміз. Қауіпті әрине, мұнда адамдар жаяу-жалпы жүреді. Бәріне ескерту керек, – деді риддерлік тұрғындар.
Бұдан бірнеше күн бұрын тұрғындардың бірі екінші шағын ауданынның Шоссейная көшесінде жолдан жүгіріп өткен аюды бейнежазбаға түсіріп алған. Көліктің дауысы мен жарығынан сескенген хайуан қала сыртына қарай қаша жөнелген.
Дәл осы екінші шағын ауданда тағы бір куәгер ағашқа өрмелеп шығып алған қонжықты бейнежазбаға түсіріп алып, әлеуметтік желіге салды. Желі қолданушыларының қызу талқысына түскен бейнежазбаның жарияланғанына да көп уақыт болған жоқ.
