Риддер қаласында 600 орындық жаңа мектеп ашылды. «Келешек мектептері» ұлттық жобасы аясында салынған білім ордасының ашылу рәсіміне ШҚО әкімі Нұрымбет Сақтағанов қатысты. Аймақ басшысы сыныптарды аралап, ұстаздар мен оқушыларды Білім күнімен құттықтады, деп хабарлайды F16.kz.
Қазір Риддерде «Казцинк» компаниясының қаржыландыруымен тағы бір 600 орындық мектептің құрылысы жүріп жатыр. Нысан келесі жылы пайдалануға берілмек. Бұдан бөлек, құны 8,3 миллиард теңге болатын, жыл бойы жұмыс істейтін, балаларға арналған 200 орындық демалыс орталығының жобасы әзірленіп жатыр. Сонымен бірге, қалада қосымша 6 білім нысаны жөндеуден өтуде. Биыл робот техникасы, биология және физика бағытындағы 3 жаңа кабинет сатып алынбақ.
Еске саалйық, жаңа оқу жылы қарсаңында Шығыс Қазақстан облысында білім беру жүйесін жаңғыртуға бағытталған «Келешек мектептері» ұлттық жобасы аясында бірнеше заманауи мектеп пайдалануға берілді.
Мәселен, Өскемен қаласында №31, №40 және №41 мектептер алғаш рет есігін айқара ашты. Сонымен қатар Глубокое ауданының Белоусовка кентіндегі №2 орта мектебі мен «Опытное поле» мектебі, Зайсан қаласындағы «Сауыр» орта мектебі оқушыларды қабылдай бастады.
Аталған жобалар Білім беру инфрақұрылымын дамыту қорының қолдауымен жүзеге асырылды.
Жаңа оқу жылы қарсаңында облыстағы 319 мектеп асханасы толықтай жөнделіп, барлық қала мен ауданда оқушылардың тамақтану сапасын бақылау топтары жұмысын бастады.
Сонымен қатар, Ұлан ауданындағы Бозанбай орта мектебін ерекше атап өттуге болады. Бұл білім ордасы Қазақстандағы үздік 100 мектептің қатарына енді. Мектепте күрделі жөндеу жүргізіліп, материалдық-техникалық база жаңартылды. Жаңа оқу кабинеттері, кітапхана, телестудия, STEM-зертхана және заманауи спорт залы ашылды.
