Еліміздің бірнеше мың азаматы «дропперлікке» қатысы бар деп танылып, «сұр тізімге» енгізілді. Бұл туралы Қаржы нарығын реттеу және дамыту агенттігінің төрайымы Мәдина Әбілқасымова хабарлады, деп жазады F16.kz.
– Дропперлерге қатысты деректер үнемі жаңартылып отырады. Қазіргі уақытта бұл тізімде бірнеше мың адам бар. Олардың шоттары ғана емес, барлық операциясы да бұғатталады. Тексеру жүргізілуде. Сұр тізім дегеніміз – тексеру кезеңіне қатысты ұғым. Егер күдік расталса, адам қара тізімге енгізіледі. Егер расталмаса, онда ол бұл тізімнен шығарылады, – деді М.Әбілқасымова.
Дроппер немесе дроп – бұл алаяқтар ұрлаған ақшаны өзінің банк картасы арқылы өткізетін адам. Кейде карточкасын үшінші тұлғалар пайдаланғанын білмеген адам алаяқтық объектісіне айналып жатады. Дроп өзінің қылмыстық схемаға тартылғанын әрдайым түсіне бермейді, өйткені алаяқтар әдетте өз әрекеттерін «заңды бизнес» ретінде жасырады. Дропперлер қылмыскерлердің сыбайласы ретінде ҚР Қылмыстық кодексінің 190-бабына сәйкес жауапқа тартылып, бас бостандығынан айырылуы мүмкін.
Дроп – бұл сленг, ағылшын тіліндегі drop – тастау, лақтыру етістігінен шыққан.
