2019 жылдан бері елімізде 1 миллионнан астам оқушыға арналған 1 200 мектеп салынды. Тек 2023-2024 жылдары 510 мың орынға арналған 422 жаңа мектеп ашылды, деп хабарлайды F16.kz тілшісі Оқу-ағарту министрлігіне сілтеме жасап.
Осы шаралардың нәтижесінде еліміздегі үш ауысымды мектептердің саны 4 есе, апатты мектептердің саны 2 есе азайды, ал оқушы орындарының тапшылығы 4 есе қысқарды.
Мемлекет заманауи және қолайлы білім беру ортасын құру бойынша жүйелі жұмысты жалғастыруда. Жаңа оқу жылының қарсаңында өңірлерде 115 мың оқушыға арналған тағы 83 жаңа мектеп ашылды, оның 57-сі «Келешек мектептері» ұлттық жобасы аясында салынған. Жаңа мектептердің пайдалануға берілуі Шымкент, Алматы қалаларында, сондай-ақ Ақмола, Қарағанды және Қызылорда облыстарында үш ауысымды оқыту мәселесін толығымен жоюға мүмкіндік берді.
– Қазіргі уақытта елімізде 3 000 мектеп бір ауысымда, 5 000-нан астам мектеп екі ауысымда жұмыс істейді. Жыл соңына дейін 140 мың орынға арналған тағы 111 мектептің құрылысы аяқталады, – деп жазады дерек көзі.
Жоғарыда аталған жобалардың жүзеге асырылуы еліміздің бірқатар өңірінде үш ауысымды оқыту мәселесін жоюға және 150 мың орын тапшылығын қысқартуға мүмкіндік береді.
Белгілі болғандай, 2025-2026 оқу жылында елімізде 267 мың оқушыға арналған 232 жаңа мектеп салынады. Сонымен қатар 245 мектеп жаңғыртудан өтеді, тағы 1 000 ауыл мектебі модернизацияланады, ал 680 білім ордасына 1 100 заманауи пәндік кабинет орнатылады.
