Өскемен әкімі Алмат Ақышов қала іргесіндегі Шығыс ауылының тұрғындарын жаңағымды жаңалықпен қуантты, деп хабарлайды F16.kz.
Қала аумағындағы Ахмер, Меновное, Новоявленка бәрі де ауыл санатына жатады екен, Шығыс ол қатарда жоқ. Бұл әділетсіздік дер едім. Сондықтан қалалық мәслихатпен бірге осы мәселемен айналысып, олқылықтың орнын толтырдық. Шығысқа ауыл мәртебесі берілді. Енді ондағы адамдар бірқатар жеңілдіктерге ие болады. Мәселен, педагогтардың еңбекақысына 25 пайыз көтермеақы қосылады. Мектеп бітірген түлектерге де жеңілдіктер бар. Одан бөлек “Дипломмен ауылға” бағдарламасына қатысады, – деді қала әкімі.
Бұл шешім ауыл тұрғындарын қуантты. Белгілі ақын, журналист Мұратхан Кенжеханұлы ұзақ жылдан бері күрмеуі тарқатылмай келе жатқан мәселенің түйнін шешіп берген қала басшылығына әлеуметтік желіде ел атынан алғыс айтты.
Шынында шешімін таппай келе жатқан мәселе болатын. Өскемен қаласының әкімі Алмат Акышов мырзаға ауыл атынан алғыс! — деді ол.
Өскеменнің Шығыс ауылы 2012 жылы бой көтерген. Онда негізінен Қытай, Моңғолия, Өзбекстан сияқты шет мемлекеттерден атажұртқа қоныс аударған ағайындар тұрады. Сондай-ақ Шығыс Қазақстан облысының болашағы жоқ елді мекендерінен көшіп келген отбасылар да осында ірге тепкен.
