Бүгін Астанада Президент халыққа арнап жыл сайынғы Жолдауын жариялады. Залда отырғандар арасында «Үлбі металлургия зауыты» АҚ-ның 5-разрядты дозиметрисі Сергей Мехнин де болды. Қарапайым еңбек адамы үшін мұндай маңызды жиынға қатысу ерекше сәтке айналды.
Ол Президент Жолдауы – елдің даму бағытын айқындайтын стратегиялық құжат қана емес, сонымен бірге экономиканы ілгері сүйреге еңбек ұжымдары үшін практикалық нұсқаулық екенін атап өтті.
Сергей Мехнин ҮМЗ-ның облыс ғана емес, бүкіл ел үшін маңызды рөл атқаратынын айтты.
Біз өніміміздің әлемдік нарықта сұранысқа ие болып, Қазақстанның өнеркәсіптік әлеуетін нығайтып жатқанына мақтанамыз, – деді ол.
Мемлекет басшысы өз сөзінде өңдеуші өнеркәсіпті дамытуға ерекше көңіл бөлді. Президенттің айтуынша, соңғы бес жылда бұл саланың экономикаға қосқан үлесі айтарлықтай артты. Өңдеуші сектордың ЖІӨ-дегі үлесі 12,4%-ға жетті. Тек былтырдың өзінде Қазақстанда 163 жаңа өндіріс іске қосылып, 12 мыңнан астам тұрақты жұмыс орны құрылды.
Сергей Мехниннің тағдыры ҮМЗ-мен тығыз байланысты. 1962 жылы Алтай ауданының Лесная Пристань ауылында дүниеге келген ол Новосібір электротехника байланыс техникумын тәмамдап, әскер қатарында қызмет еткен. 1983 жылдан зауытта еңбек жолын бастаған. Содан бері 35 жылдан астам уақыт бойы осы кәсіпорында жұмыс істеп келеді: Чернобыль АЭС апатының зардаптарын жоюға қатысқан, заманауи жабдықтарды енгізген, ұтымды ұсыныстардың авторы болған. Көп жылғы адал еңбегі үшін Қазақстан атом саласының «Еңбек сіңірген қызметкері» III дәрежелі Құрметті төсбелгісімен марапатталған.
Сергей Мехниннің еңбек жолы – қарапайым жұмысшы еңбегінің ел дамуына қаншалықты зор үлес қосатынының айқын мысалы. Ал Президент Жолдауы оның және әріптестерінің көзқарасында жұмысшы мамандықтарының бүгінгі таңда Қазақстанның жаңа өнеркәсіптік өрлеу кезеңіне апарар үлкен жолдың маңызды бөлігі екенін дәлелдеді.
