ШҚО полицейлері мал ұрлығымен айналысқан топты қолға түсірді, деп хабарлайды F16.kz тілшісі Polisia.kz сайтына сілтеме жасап.
Облыстық «Бекет» жедел-профилактикалық іс-шарасы барысында тәртіп сақшылары қажетті құжаттары жоқ үш малдың еті тиелген автокөлікті тоқтатқан. Жедел тергеу іс-шаралары барысында екі күдікті ұсталды. Полицейлер олардың бұған дейін жасалған бір ірі қара мал ұрлығына қатысы барын анықтады. Қылмыстық әрекеттер салдарынан 600 мың теңгеден астам шығын келтірілген.
Күдіктілер ұрланған малды облыс орталығына жеткізіп, ет базарында сатуды жоспарлаған. Тәркіленген үш малдың еті заңды иелеріне қайтарылды. Ұсталғандарға қатысты ҚР Қылмыстық кодексінің 188-бабы (Ұрлық) бойынша сотқа дейінгі тергеу амалдары басталды. Күдіктілер уақытша ұстау изоляторына қамалды. Қазіргі уақытта қажетті тергеу амалдары жүргізілуде.
– Полиция өңір тұрғындарын өз мүлкін қорғау шараларын дер кезінде қабылдауға, малды қараусыз қалдырмауға, қораларды нығайтуға, жануарларды таңбалауға шақырады. Мал ұрлығы немесе жоғалуы жағдайында бірден «102» нөміріне хабарлау қажет, – деп жазады дерек көзі.
