ШҚО әкімі Нұрымбет Сақтағанов «Самұрық-Энерго» АҚ басшылығымен кездесті. Тараптар Өскеменде жаңа жылу электр орталығын салу жобасын талқылады, деп хабарлайды F16.kz.
Холдинг басшылығының айтуынша, биыл негізгі мердігерлермен келісімшартқа қол қою жоспарланған.
Жыл соңына дейін келісімшартқа қол қойылса, келер жылы көктемде құрылыс қалашығын, қоймаларды және кіреберіс жолдарды салу жұмыстары басталады, — деді холдинг басшылығы.
Жаңа нысан жобасында қуатты арттыру мүмкіндігі қарастырылған. Одан бөлек, қоршаған ортаға зиянды әсерді барынша азайту үшін «таза көмір» технологиясы қолданылады. Аталмыш технология көмір генерациясының тиімділігін арттырады, сонымен бірге тұтынушылар үшін электр энергиясының қолжетімділігін сақтап қалады.
Кездесу барысында энергиямен қамтамасыз ету, жылу қуаты және ЖЭО түсетін қосымша жүктемеден туындауы мүмкін тәуекелдер мәселесі де талқыланды.
Облыс әкімдігі өз кезегінде жер учаскелерін бөлу және жоспарлардың орындалуын тұрақты негізде бақылап отыруға жан-жақты қолдау көрсетуге дайын екендігін жеткізді.
