Халыққа және әлеуметтік маңызы бар азық-түлік өндірушілерге арналған тариф жыл соңына дейін өспейді. Бұл туралы Үкіметте өткен жиында белгілі болды, деп хабарлайды F16.kz порталы Премьер-министрдің баспасөз қызметіне сілтеме жасап.
Инфляцияны тежеу мәселелері жөніндегі кезекті жиында Премьер-министрдің орынбасары – ұлттық экономика министрі Серік Жұманғарин өңірлік тұрақтандыру қорларын жаңа өніммен толтыру бойынша келісімшарт жасасу жұмыстарының және «Тарифті инвестицияға айырбастау бағдарламасының жүзеге асырылу барысы туралы баяндамаларды тыңдады.
Ұлттық экономика министрлігі Табиғи монополияларды реттеу комитетінің төрағасы Тимур Қосымбаевтың мәлімдеуінше, биылға жоспарланған коммуналдық тарифтер бағасын көтеру аяқталған, ал табиғи монополия субъектілерінен жаңа өтінімдер келіп түскен жоқ. Сол себепті жыл соңына дейін халық пен жеңілдігі бар тариф саясаты қолданылатын әлеуметтік маңызы бар азық-түлік өндірушілеріне тариф көтерілмейді. Бұл ақылы қызметтердің қымбаттауының инфляцияға әсерін азайтуға мүмкіндік береді.
Сонымен қатар өңірлерде жаңа өнімге келісімшарттар жасасу жұмысы қарқынды жүргізілуде. Ауыл шаруашылығы вице-министрі Ербол Тасжүрековтің мәліметінше, картоп, пияз, сәбіз және қырыққабат жеткізуге арналған келісімшарттар 2025–2026 жылдардың маусымында халықтың қажеттілігін 50% қамтып отыр. Мәселен, Атырау, Алматы облыстары мен Астана қаласында пиязға сұраныс толық жабылған. Қарағанды, Түркістан, Абай, Ақмола облыстары мен Алматы қаласында да жұмыс қарқынды. Бірақ Ақтөбе облысында көкөністің барлық түрі бойынша келісімшарт жасасу деңгейі төмен.
Бақылауды күшейту мақсатында Серік Жұманғарин өңірлерге барып, тұрақтандыру қорларындағы көлем мен қордың жеткілікті болуын тексеретін арнайы жұмыс тобын құруды тапсырды.
