Өскеменде әлеуметтік көмірдің бір тоннасы 16 200 теңгеден сатылып жатыр. Қала билігі жылдағыдай қара күзде дүрбелең туындамас үшін тұрғындарға отынды қазірден бастап тасып алу қажеттігін айтты, деп хабарлайды F16.kz.
Өскемен қалалық Ауған соғысы ардагерлері ұйымының жетекшісі Олег Фроловтың айтуынша, әлеуметтік көмір табысы төмен, көпбалалы, толық емес отбасыларға, зейнеткерлеге, мүгедектер және басқа да жеңілдікке ие санаттағы азаматтарға беріледі.
Өскемен әкімдігі, “Қаражыра” «АҚ және Ауған соғысы ардагерлері ұйымы бірлесіп әлеуметтік жағдайы төмен отбасыларға жеңілдікпен көмір жеткізу бойынша меморандум жасаған. Бірнеше жылдан бері осы меморандум аясында жұмыс атқарылып келеді. Биыл қалада әлеуметтік көмірдің тоннасы 16 200 теңгеден сатылып жатыр. Оны күн ашық, жер жазықта жеткізіп алған дұрыс. Кейін жауын-шашын жиілеп, отын су болады. Әлеуметтік көмір алу үшін аталған санатқа жататын отбасы өзінің тұрғылықты мекен жайындағы аумақтық басқару орталығына барып өтініш қалдыруы керек, – деді Олег Фролов.
