Шығыс Қазақстан облысында 2023 жылдан бері жүзеге асып келе жатқан «Ауыл аманаты» бағдарламасы ауыл өміріне жан бітіріп, кәсіпке ынталы азаматтарға жаңа мүмкіндік ашып отыр, деп хабарлайды F16.kz.
Бағдарлама аясында 2024 жылы облыста 2,5 млрд теңгеге 187 жоба қаржыландырылып, 63 ауыл шаруашылығы кооперативі несие қаражатына жұмысын кеңейтті. Нәтижесінде 352 жаңа жұмыс орны ашылды.
Қандай жобалар қаржыландырылды?
Қаржыландырылған жобалар туризмнен бастап, өнім өңдеу, техника сатып алу, құс және өсімдік шаруашылығына дейінгі түрлі бағыттарды қамтыды. Қазір өңірде 234 кооператив жұмыс істеп жатыр. Онда 400-ден астам адам еңбек етеді.
Премьер-министрдің орынбасары Қанат Бозымбаевтың тапсырмасына сәйкес, ШҚО-да қосымша 25 жаңа кооператив құру жоспарланған.
Ал 2025 жылы бағдарламаға 3 млрд теңге бөлініп, 305 жоба қолға алынды. Бұл өз кезегінде 305 жаңа жұмыс орнын құруға мүмкіндік береді.
Әкімдер де оқып жатыр
Ауылдарды тиімді басқару мақсатында облыстағы барлық ауыл әкімдері «Әкімдер мектебі» аясында оқудан өтті.
Бұл бастама ауылдар мен аудандарда жаңа басқару мәдениетін қалыптастыруға ықпал етеді. Бұл жұмыс жалғасады,– деді облыс әкімі Нұрымбет Сақтағанов.
Бағдарламаның іске асу барысы жақында ШҚО-ға жұмыс сапарымен келген Amanat партиясының хатшысы Елдар Жұмағазиевтің қатысуымен талқыланды. Кездесуге облыс әкімінің орынбасары Дархан Сапанов та қатысты.
