Шығыс Қазақстан облысында отбасылық-тұрмыстық қылмысқа қарсы шаралар күшейтілді. Биылдың өзінде 3 мыңнан астам арыз тіркелді, деп хабарлайды F16.kz порталы polisia.kz—ке сілтеме жасап.
Полицияның мәліметінше, тіркелген құқықбұзушылықтардың дені тәртіп сақшыларының бастамасымен анықталған. Мамандардың айтуынша, көптеген азамат әлі күнге дейін зорлық-зомбылық көрсетушіні кешіріп, қорғауға дайын тұрады. Сондықтан мұндай қылмыстың алдын алуға басымдық беріліп отыр.
Қорғаныс нұсқамаларының саны 3 мыңнан асты. Тұрмыстық қылмыстардың көбі ішімдіктің кесірінен болады. Сондықтан алкогольге тыйым салу секілді шектеулер жиі қолданылады, – деді ШҚО полиция департаментінің өкілі Алена Мокина.
Облыста әйелдер мен балаларға арналған дағдарыс орталықтары мен уақытша баспаналар желісі жұмыс істейді. Өскемен, Алтай және Шемонаиха қалаларында орналасқан бұл мекемелерде зардап шеккендер 6 айға дейін тұра алады. Осы кезең ішінде мамандар психологиялық, әлеуметтік және құқықтық көмек көрсетеді.
Осы жылдың басынан бері дағдарыс орталықтарына 2 793 адам жүгінген. Олардың ішінде 84 әйел уақытша паналау орындарына орналастырылған.
Аталған салада оң өзгерістер байқалғанымен, мәселе тек полиция мен мамандардың араласуымен шешілмейді. Отбасындағы зорлық – бұл тек жеке адамның мәселесі емес, қоғамның ортақ қасіреті.
