ШҚО-да 18 жастағы жігіт интернет-алаяқтыпен айналысты деген күдікке ілінді. Ол желідегі бөгде адамдардың аккаунтты бұзып, таныстарынан ақша алған, деп хабарлайды F16.kz.
ШҚО ПД киберқылмысқа қарсы іс-қимыл басқармасы қызметкерлерінің анықтауынша, жас жігіт өз айласын әлеуметтік желілердегі тікелей эфирлер арқылы іске асырған. Яғни, стрим жүргізушілер өз нөмірлерін экранға шығарып, екінші мобильді құрылғыларын көрсетіп отырған. Мессенджерге кіруді растау үшін жіберілген SMS хабарламала да сол тікелей эфирге түсіп қалған.
Код арқылы күдікті жәбірленушілердің аккаунттарына қол жеткізіп, контактілеріндегі таныстарынан қарызға ақша алады. Нәтижесінде 5 адам зардап шекті. Аталған факт бойынша «Алаяқтық» бабымен қылмыстық іс қозғалып, сотқа дейінгі тергеу жүргізіліп жатыр. Тергеу барысында күдіктінің өзге де осындай қылмыстарға қатысы бар-жоғы тексеріледі, — дейді ШҚО ПД баспасөз қызметі.
Тәртіп сақшылары тікелей эфирге шыққанда жеке деректеріңізді жарияламау керектігін тағы бір еске салады.
