Риддердегі аурухана кешенінің құрылысы 2021 жылы желтоқсанда басталған. Бүгінде құрылыс жұмыстары аяқталуға жақын. 80 жылдан астам уақыт жұмыс істеп келген ауруханың орнына 500 адамды қабылдайтын емханасы мен 200 орындақ стационары бар медициналық мекеме бой көтерді, деп хабарлайды F16.kz.
Айта кетейік, бұл нысанның қолданысқа берілуін риддерліктер асыға күтіп жүргені рас. Қазіргі таңда тұрғындар өткен ғасырда салынған тар, талапқа сай келмейтін ғимаратта ем қабылдауға мәжбүр.
2021 жылы көпсалалы аурухананың құрылысы басталғанда халық бір марқайып қалған. Алайда, бұл қуаныш ұзаққа созылмады. Қаржыландырудың болмауына байланысты жұмыс тоқтады. Былтыр тұрғындардың үміт оты қайта тұтанды. Қайтарылған активтер есебінен қаржы бөлініп, құрылыс қайта жанданды.
ШҚО әкімінің бірінші орынбасары Жақсылық Омар жұмыс барысымен арнайы танысып қайтты.
Аурухана құрылысын биыл желтоқсан айында аяқтау жоспарланған. Жаңа нысан көп ұзамай Риддер қаласының және жақын маңдағы ауыл тұрғындарына сапалы медициналық көмек көрсету үшін жұмысын бастайды. Кең палаталар мен заманауи жабдықтар жеткізіліп, білікті мамандар тартылады, — деді Жақсылық Мұқашұлы.
Бірақ құрылысшылар нысанды жоспарлаған мерзімнен тағы кешіктіруі мүмкін.
Жақсылық Омар «Элхон» ЖШС мердігер ұйымының өкілі Жәнібек Жамантиковпен кездесіп, жұмысты жеделдету керек екенін, әйтпесе нысанды тапсыру 2026 жылға ауысатынын атап өтті.
Сіз жұмысты екі-үш ауысымда ұйымдастыруыңыз керек және қала оны бақылауы керек, – деді әкім орынбасары.
Мемлекет басшысы Қасым-Жомарт Тоқаев Қазақстан халқына Жолдауында денсаулық сақтау жүйесін дамыту үшін жүйелі шаралар қабылдап жатқанын атап көрсетті.
Елімізде медицина нысандары біртіндеп жаңғыртылуда. Ауылдағы фельдшерлік-акушерлік пункттерден бастап мамандандырылған ауруханаларға дейін жаңартылып жатыр, — деді Президент.
Риддердегі аурухана құрлысы да бұл жұмыстардың айқын мысалы болмақ.
