Бүгін, 18 қыркүйете Шығыс Қазақстан облысының әкімі Нұрымбет Сақтағанов халықаралық EuroSkills Herning 2025 чемпионатында «Кәсіби шеберлігі үшін» медальон иеленген Қазақстан ұлттық құрамасының мүшесі Артём Мочинскиймен кездесті, деп хабарлайды F16.kz.
Артём – Өскемен жоғары политехникалық колледжінің 4-курс студенті, «WorldSkills Shygys 2024» өңірлік чемпионатының жеңімпазы және «WorldSkills Kazakhstan 2024» ұлттық чемпионатының күміс жүлдегері.
Қазақстан құрамасы сапында ол Данияда «Мехатроника» құзыреті бойынша табысты өнер көрсетіп, жоғары халықаралық бағаға ие болды.
Шығысқазақстандық жастардың халықаралық аренадағы жетістіктері – кәсіби даярлық пен ұстаздардың қолдауының нәтижесі. Артёмның жеңісі – тек колледждің емес, бүкіл облыстың мақтанышы, – деді Нұрымбет Сақтағанов.
Артём Мочинский мұндай беделді халықаралық чемпионатта табысқа жету оңай болмағанын айтты. Әсіресе, жаңа контроллерлерді бұрын таныс болмаған жабдыққа қосуға тура келген үшінші күн ең қиын сынақ болғанын жасырмады.
Бұл жарыстан кейін қиын жағдайларда жылдам әрекет етіп, дұрыс шешім қабылдауды үйрендім. Колледждегі оқуымды аяқтаған соң жергілікті университетте білім алуды жоспарлап отырмын, – деді ол.
Кездесу соңында ШҚО әкімі Артём Мочинскийге алғыс хат пен смарт сағат табыстап, алдағы сайыстарда жаңа жетістіктерге жетуіне тілектестік білдірді.
