Шығыс Қазақстанда автомобиль жолдарын қыс маусымына дайындау жұмыстары аяқталып қалды. Жанармай қоры толықтырылып, инертті материалдар әзірленді, техникалар да сақадай-сай тұр. Бұл туралы бүгін облыс әкімдігінде жолаушылар көлігі және автомобиль жолдары басқармасы басшысының орынбасары Нұрбек Тұраров мәлім етті, деп хабарлайды F16.kz.
Аймақ басшысы Нұрымбет Сақтағанов ең бастысы адамдардың қауіпсіздігі мен көлік қатынасының үздіксіз жүруін қамтамасыз ету қажеттігін атап өтті.
Тиісті басқарманың мәліметінше, қазірдің өзінде 140 мың литр жанармай дайындалып, отын жеткізетін операторлармен келісімшарттар жасалған. Қордағы жанармай азайғанда үстіне қосымша толықтырылып отырады. Қыс бойы өңір жолдарын күтіп ұстауға шамамен 500 мың литр жанармай қажет. Дайындық жұмыстары биылғы 15 қазанға дейін толық аяқталады. Атап айтқанда, көктайғаққа қарсы материалдарды дайындау және оларды қауіпті учаскелерге (тау жолдары, еңістер мен өрлер, автотұрақтар) жеткізу, 50 тонна көлемінде техникалық тұз сатып алу, 130 уақытша жол белгісін дайындау, 2500 бағыттаушы (сигналдық) баған орнату, 800 тонна көмір сатып алу, 1666 жасанды құрылымды және оларға кіреберіс жолдарды (оның ішінде 96 көпір) тазарту.
Облыстық маңызы жолдарда қар басып қалатын тоғыз қауіпті учаскеде (Өскемен – Тарғын – Самар, Марқакөл – Ұрынхай – Төсқайы, Күршім – Қалжыр бағытындағы жолдар) дайындық жұмыстары аяқталуға жақын. Бұл учаскелерде қар тоқтататын қалқандар орнатылып, ор (траншея) қазылды.
Сонымен қатар қар көшкіні қаупі бар аймақтарға (Өскемен – Тарғын – Самар, Өскемен – Таулы Үлбі – Северное бағытындағы жолдар) ерекше назар аударылған.
Өңірді көгалдандыру және қар тоқтату мақсатында Өскемен – Тарғын – Самар жолының 74–77 шақырымында 5 мың көшет егілді.
Барлық іс-шаралар адамдардың қыс мезгіліндегі қауіпсіздігін қамтамасыз етуге бағытталған. Жол инфрақұрылымын уақытылы дайындау – көлік қозғалысының үздіксіздігін және адам өмірінің қауіпсіздігін қамтамасыз етудің кепілі, — деп атап өтті Нұрбек Тұраров.
