Өскеменде құқық қорғау органдары 147 адамға іздеу жариялаған. Оның 51-і қылмыскер, деп хабарлайды F16.kz.
Облыс орталығында прокуратура, полция және сот орындаушыларының қатысуымен адамдарды іздеу жұмысының тиімділігін арттыру мәселесін талқылады. Бүгінде іздеу шаралары белсенді жүргізіліп жатқан жоқ. Сол себепті қалалық прокуратура тарапынан жұмысты ширатып, нақты нәтижеге қол жеткізу міндеті қойылды.
Ресми мәліметке сүйенсек, қазіргі уақытта қалада 147 адам іздеуде жүр. Оның ішінде 51 қылмыскер, 33 із-түссіз жоғалған, 20 соттан қашып жүрген, 13 жеке басы анықталмаған (мәйіт), 30 борышкер мен алимент төлемеген адам бар, — деп хабарлады Өскемен қалалық прокуратурасы.
Сонымен қатар жеке сот орындаушылары тарапынан іздестіру шараларын мән-жайды тексермей, немқұрайлы бастаған жағдайлар анықталды. Бұл азаматтар құқығының бұзылуына және қарызды өндіру үдерісінің созылып кетуіне әкеліп соғады.
Қадағалаушы орган өкілдері полиция мен сот орындаушыларынан іздестіру тәсілдерін қайта қарап, қылмыскерлер мен борышкерлерді анықтауда нақты нәтижеге қол жеткізуді талап етті.
