Ауыл шаруашылығы министрлігі елімізде 1 келі сиыр етінің бағасы 3 400-3 500 теңге деңгейінде екендігін және оның өндірушілердегі орташа көтерме баға болып саналатынын түсіндірді, деп хабарлайды F16.kz.
Министрліктің ақпаратына сенсек, еліміздің сауда нүктелерінде ет жеткізу, сақтау және басқа да объективті шығындар ескеріле отырып сатылады. Соның нәтижесінде мәселен Астанада бөлшек саудадағы баға килограмына 3 700-4 300 теңгеге дейін жетеді.
Ал қабырға-жауырын бөлігі әлеуметтік маңызы бар азық-түлік тізіміне енгізілгендіктен және бұл санатқа сауда үстемесі 15%-дан аспайтындықтан, килограмына 3 100-3 400 теңге бағамен сатылады.
Өңірлерде еттің бөлшек саудадағы орташа бағасы келісіне 3 500-4 300 теңге шамасында.
– Ал жоғары деңгейлі бөліктердің (сиыр филесі, қалың және жіңішке жиегі, белдің бір бөлігі) және басқа да бөліктердің (жамбас еті, іш майы және т.б.) бағасы мемлекет тарапынан реттелмейді, нарықтық жолмен қалыптасады, – деп жазады министрліктің баспасөз қызметі.
