Шығыс Қазақстан облысында кенеге қарсы қолданылатын иммуноглобулин тапшылығы туындады. «СК-Фармация» компаниясы қажетті препараттың не себепті жетіспей қалғанын түсіндірді, деп хабарлайды F16.kz порталы «ҚазАқпарат» агенттігіне сілтеме жасап.
Дәрігерлердің айтуынша, өңірде иммуноглобулинге сұраныс жоғары, ал медицина мекемелеріне қажетті дәрі әлі жеткізілген жоқ. Ақырғы дозалары жаздың соңында біткен.
«СК-Фармация» ЖШС-ның мәліметінше, 2025 жылға облыс жалпы көлемі 23,85 литр өтінім берген. Бұл толық сатып алынып, жеткізілді. Бірақ биылғы көктемнің ерте келуі кенелердің көбеюіне әсер етті. Сол себепті препарат қысқа мерзімде түгесіліп қалды.
Облыс қосымша тағы 10 литр иммуноглобулинге өтінім берді. Бірақ қоймаларда бұл препарат таусылып қалған. Біз өндірушілерге сұраныс жолдадық, бірақ олардан бас тарту туралы жауап алдық. Қолда бар дайын өнім жоқ, — деп хабарлады «СК-Фармация» компаниясынан.
Қазір аталған компания тығырықтан шығудың жолын қарастырып жатыр. Қажетті препарат қоймаға қалай келеді, солай ШҚО-ның медицина ұйымдарына жөнелтіледі.
Сонымен қатар дәрігерлер энцефалиттің алдын алу шарасы кене шаққан алғашқы күндері жүргізілсе ғана тиімді болатынын айтты. Сондықтан дәрі тапшылығы кене шаққан адамдардың денсаулығына қауіпті
Тұрғындар қазір кененің шаққан жерін жай ғана антисептикпен өңдеуге мәжбүр.
