Зайсан көлінде суға батып кеткен балықшының денесін іздеу жұмыстары тоқтатылды, деп хабарлайды F16.kz.
Іздеу жұмыстарына эхолот, ұшқышсыз ұшу аппараты және спутниктік терминал қолданылып, ТЖД сүңгуірлері 29 мәрте су астына түсті. Нәтижесінде, 28 қыркүйек күні Тарбағатай ауданы Шорға ауылының маңындағы Зайсан көлінде 1986 жылы туған балықшының денесі судан шығарылды. Құтқарушылар марқұмның денесін жағадан 3 шақырым жерден тапты, — дейді ШҚО ТЖД баспасөз қызметі.
Естеріңізге сала кетейік, қайғылы оқиға 22 қыркүйек күні болған. Ер адам көл бетіне қайығымен жалғыз өзі шығып, қайта оралмаған. Құтқарушылар мен ауыл тұрғындары іздеу жұмыстарына сол күні кіріскен. Қосымша күш ретінде сүңгуірлер, жергілікті атқарушы органдар, полиция департаментінің қызметкерлері тартылды.
