Өскеменде 45 жастағы әйелді соққыға жығып, бірнеше жерден пышақтап өлтірген ер адам 14 жылға сотталды. Бұл туралы Өскемен қалалық прокуратурасының баспасөз қызметі мәлімдеді, деп хабарлайды F16.kz.
Естеріңізге сала кетейік, былтыр 13 тамыз күні қаладағы саяжайлардың бірінен әйел адамның денесі табылған. Сот-медициналық сараптама қорытындысы 45 жастағы қала тұрғыны жабық бас-ми жарақаты салдарынан миға қан құйылып қайтыс болғанын көрсетті. Сондай-ақ сарапшылар марқұмның бірнеше жерден пышақталғанын да анықтады.
Күдікті әйелді алдымен ауыр затпен ұрып өлтіріп, сенімді болу үшін бірнеше жерден пышақтаған. Артынша, бірден қаладан бой тасалаған ол көп ұзамай Күршім ауданында қолға түсті. Тергеу барысында өз кінәсін мойындаудан бас тартқан күдікті жазадан құтылу үшін психикалық ауытқуы бар болып көрінуге де тырысқан. Алайда, сараптама бұл диагнозды жоққа шығарды, — дейді қалалық прокуратураның баспасөз қызметі.
Айта кету керек, күдікті осыған дейін бірнеше рет кісі өлтіргені үшін сотты болған.
Іс алқабилердің қатысуымен қаралып, нәтижесінде күдіктіге қатаң режимдегі мекемеде 14 жыл бас бостандығынан айыру жазасы тағайындалды. Сот үкімі заңды күшіне енген жоқ.
