Президент Cерджо Маттарелла Қасым-Жомарт Тоқаевты Италияның ең жоғары наградасы – «Италия Республикасына сіңірген еңбегі үшін» орденімен марапаттады, деп хабарлайды F16.kz порталы Ақордаға сілтеме жасап.
Еліміздің бұл жоғары наградасы Италиямен достық қатынасты нығайтуға үлес қосқан мемлекеттер басшыларына ғана беріледі. Сіздің әлемдік тәртіпті қамтамасыз етуге және бейбітшілікті қолдауға бағытталған қызметіңізді жоғары бағалаймыз. Сондай-ақ Италия мен Қазақстан арасындағы ынтымақтастықты дамытуға ұдайы атсалысып келе жатқаныңыз үшін ризашылық білдіреміз. Сізге табысталып отырған бұл марапат біздің республикамызға сіңірген еңбегіңіздің бағасы, – деді Италия басшысы.
Қасым-Жомарт Тоқаев Серджо Маттарелланың қолынан жоғары мемлекеттік награда алу зор мәртебе екенін жеткізіп, алғыс айтты.
Италиядан келген мәртебелі мейманға Қазақстан тарапынан да ерекше құрмет көрсетілді. Қазақстан және Италия елдерінің арасындағы достық пен ынтымақтастықты нығайтуға айрықша үлес қосқаны үшін Серджо Маттареллаға І дәрежелі «Достық» ордені салтанатты түрде табысталды.
Қазақстан Президенті бұл қазақ елінің шынайы құрметі, барша Италия халқына деген достық пейілі мен ыстық ықыласының айғағы екенін жеткізді.
Сіз еліңіздің өсіп-өркендеуіне зор еңбек сіңіріп келесіз. Бүгінде Италия барлық салада толайым табысқа жетті. Әлемдік көшбасшылар қатарына кіретін мемлекеттің бірі. Еліңізде экономика, инновациялық технология саласында тың жобалар жүзеге асырылып жатыр. Экология, «жасыл» энергетика бағытында озық бастамаларыңыз бар. Италияның терең тарихы, бірегей мәдени мұрасы – бүкіл адамзаттың құнды қазынасы. Сіздер аймақтық және жаһандық қауіпсіздікті сақтау ісінде маңызды рөл атқарып жатсыздар. Халықаралық мәселелерді шешуге белсене атсалысып келесіздер. Бұл – Сіздің салиқалы саясатыңыздың жемісі. Өзіңіздің басшылығыңызбен Италия алдағы уақытта да биік белестерді бағындыра береді деп сенемін, – деді Қасым-Жомарт Тоқаев.
