Бүгіннен, яғни 1 қазаннан бастап Өскемен қаласында жылумен және ыстық сумен қамтамасыз ету қызметтеріне қатысты тарифтер өзгерді, деп хабарлайды F16.kz.
Табиғи монополияларды реттеу комитетінің Шығыс Қазақстан облысы бойынша департаменті Ұлттық экономика министрлігінің бұйрығына сәйкес төлем мөлшерін төмендету туралы шешім қабылдады. Бұл тарифтер 2026 жылғы 31 қаңтарға дейін қолданылады.
«Шығыс Жылу» АҚ мәліметінше, үйінде жеке есептегіш құралдары жоқ, ортақ үйішілік жылу есептегіші (ОПУТ) орнатылмаған жеке тұлғалар үшін ыстық су тарифі – адам басына айына 1 168,4 теңге мөлшерінде белгіленді. Сонымен қатар:
- Жеке есептегіш құрылғысы барлар үшін 1 текше метр ыстық судың құны – 424,09 теңге;
- Ескі үйлердің тұрғындары үшін тариф төменірек: адам басына 925 теңге немесе текше метріне 353,40 теңге.
«Шығыс Жылу» АҚ мамандары атап өткендей, егер үйде ОПУТ орнатылған болса, жылыту мен ыстық суға төлем сол есептегіштің көрсеткіштері бойынша жүргізіледі және әр үй мен есептік кезеңге байланысты әртүрлі болуы мүмкін.
Кәсіпорынның қаржы директоры Алла Фатеева ай сайынғы төлемнің есебіне қатысты мысал келтірді:
– 2025 жылғы 1 қазаннан бастап жалпы ауданы 30 шаршы метр болатын, екі адам тұратын бір бөлмелі пәтер үшін ай сайынғы төлем – 5 636,68 теңге болады. Ал аумағы 50 шаршы метр, үш адам тұратын екі бөлмелі пәтердің жылу ақысы айына 9 024,47 теңгеге жетеді.
