Қазіргі уақытта Үлкен Нарын орта мектебінде қызметтік тексеру басталды. Бұл туралы аудандық білім бөлімі мәлімдеді, деп хабарлайды F16.kz.
Аудандық білім бөлімі тарапынан қажетті шаралар қабылданып, мектеп асханасында санитарлық нормалардың сақталуын және тамақтау жағдайларын тексеру мақсатында аудандық санитарлық-эпидемиологиялық қадағалау бөліміне жоспардан тыс тексеру жүргізу туралы ресми хат жолданған.
Ата-аналар да жалға алушы мен осы құқықбұзушылыққа жол берген лауазымды тұлғаларға шара қолдануды талап етіп отыр. Қызметтік тексеру басталды. Егер кінәсі дәлелденген жағдайда жауапты қызметкерлерге тәртіптік сипаттағы шаралар қабылданады, — дейді аудандық білім бөлімінің өкілдері.
Сондай-ақ мұндай жағдайлардың қайталануына жол бермеу мақсатында, аудандағы барлық мектепте оқушылардың тамақтануын бақылау шараларын күшейту міндеттелген.
Асхананы жалға алушыларға қойылатын талаптар шарттық міндеттемелер аясында күшейтіледі. Балалардың қауіпсіздігі мен денсаулығын сақтау – біздің басты міндетіміз. Орын алған жағдайдың мән-жайын анықтау бойынша барлық қажетті шаралар қабыланады, — деп атап өтті жауапты мекеме.
Естеріңізге сала кетейік, бұған дейін оқушылар мектеп асханасындағы сорпадан құрт шыққанын суретке түсіріп, ата-аналарына жібергенін жазғанбыз.
