Келер жылдан бастап Мемлекеттiк әлеуметтiк сақтандыру қорынан төленетiн екі әлеуметтiк төлемнiң мөлшерi көбеймек. Еңбек және халықты әлеуметтік қорғау министрлігінің бұйрық жобасы «Ашық НҚА» порталында жарияланды, деп хабарлайды F16.kz.
2026 жылғы 1 қаңтарға дейін Мемлекеттік әлеуметтік сақтандыру қорынан тағайындалған еңбекке қабілеттіліктен айырылу және асыраушысынан айырылу жағдайлары бойынша төленетін әлеуметтік төлемдердің мөлшерлерін 2025 жылғы 1 қаңтардан бастап алатын әлеуметтік төлемдердің мөлшерінен 10 пайызға арттыру жоспарланған, – делінген құжат жобасының қысқаша сипаттамасында.
Ведомство мәліметінше, төлемдердің мөлшері әр жағдайда жеке есептеледі. Мәселен, соңғы екі жылдағы әлеуметтік аударымдар жасалған орташа айлық табысқа, еңбекке қабілеттіліктен айрылу коэффициентіне, асырауындағы адамдар санына, міндетті әлеуметтік сақтандыру жүйесіне қатысу өтіліне және табысты алмастыру деңгейіне байланысты болады.
Асыраушысынан айырылу бойынша әлеуметтік төлем асырауында болған адамдарға тағайындалады. Ол мемлекеттік жәрдемақыдан бөлек төленеді. Қаражат асырауындағы адам 18 жасқа толғанға дейін, ал егер ол күндізгі бөлімде оқыса – 23 жасқа дейін беріледі.
Еңбекке қабілеттілігінен айырылу бойынша төлем МӘСҚ қатысушыларына мемлекеттік жәрдемақыдан бөлек тағайындалады.
Құжатты талқылау 20 қазанға дейін жалғасады.
