Шығыс Қазақстан облысы Күршім ауданының Маралды ауылындағы сегіз бас малдың өліміне қатысты ветеринариялық қызметтер жан-жақты зерттеу жүргізіп, бүгін сол жұмыстың нәтижесін жариялады, деп хабарлайды F16.kz.
Еске салсақ, биылғв 19-20 қыркүйекте Маралды ауылында сегіз бас мал өлген болатын. ШҚО әкімі Нұрымбет Сақтағановтың тапсырмасымен дереу құрылған арнайы топ оқиға орнына жетті. Мал өлекселерінен, су мен топырақтан сынама алынып, ветеринариялық зерттеулер, вакцина егу және дезинфекциялау жұмыстары жүргізілді.
Экологтар жүргізген зерттеу нәтижесіне сәйкес, рН деңгейі, қалқымалы заттар, аммоний, мұнай өнімдері, цианид, ауыр металдар және басқа да элементтер бойынша шекті рұқсат етілген мөлшерден асып кету фактісі тіркелмеді.
Бүгін өткен Маралды тұрғындарымен кездесуде мамандар жүргізген зерттеу жұмысының қорытындысы жария етілді.
Зерттеу нәтижелері бойынша сібір жарасы, пастереллез және эмфизематозды карбункул сынды аса қауіпті жұқпалы аурулардың белгісі анықталмады. Токсикологиялық тексеру де улану фактілерін көрсетпеді, тек натрий хлоридінің аздаған артық мөлшері байқалды. Қазір мамандар мал өліміне нақты не себеп болғанын анықтау мақсатында жем-шөпке, су мен топыраққа және биоматериалдарға қосымша зерттеу жүргізіп жатыр. Осындай жұмыстар Үлкен Нарын ауданының Балғын және Көктерек ауылдарында да өткізіледі, — деді ШҚО ветеринария басқармасының басшысы Рамиль Сағандықов.
Қазір Маралды ауылындағы эпизоотиялық жағдай тұрақты. Жаңадан мал өлімі тіркелген жоқ. Ветеринарлар күн сайын төрт түліктің жай-күйін қадағалап отыр.
Сондай-ақ мал өлімі себептерін тереңірек зерттеу мақсатында су, жайылымдағы жем-шөп және өзге де сынамалар тұрақты түрде алынып, зертханалық сараптама жүргізіліп келеді.
