Елімізде ауыл мектептерінің 9-12 сынып оқушыларына арналған жалпы білім беретін пәндер бойынша республикалық олимпиаданың екінші кезеңі өтіп жатыр. Білім додасының кезекті іріктеу кезеңі 8-10 қазан аралығына жоспарланған, деп хабарлайды F16.kz.
Олимпиаданың басты мақсаты – ауыл мектептерінің оқушылары үшін тең мүмкіндік қалыптастыру, дарынды әрі академиялық қабілеті жоғары балаларды қолдау және олардың зияткерлік әрі кәсіби дамуына жағдай жасау.
Екінші кезеңге бірінші турда бақ сынаған 83 мың қатысушының ішінен іріктелген 62 мыңнан астам оқушы өтті. Сонымен қатар санитариялық-эпидемиологиялық талаптардың сақталуына және қатысушыларға жайлы жағдай жасауға ерекше назар аударылған.
Олимпиада 13 пән бойынша өтеді: алтауы жаратылыстану-математикалық және жетеуі қоғамдық-гуманитарлық бағыт. Барлығы төрт кезеңнен тұратын білім сайсының алғашқы турына қатысу үшін smart.daryn.kz сайтында 125 мыңнан астам оқушы тіркелді.
Аудандық сайыстың жеңімпаздары үшінші (облыстық) кезеңге қатысады. Ол қараша–желтоқсан айларында дәстүрлі форматта, екі тур бойынша өтеді. Ережеге сәйкес, әр облыстан 780 оқушы қатысады.
