«Шығыс Салбурыны-2025» халықаралық фестиваліне шамамен 10 мыңға жуық адам қатысады деп күтілуде. Бұл туралы іс-шараның басы-қасында жүрген Ұлан ауданының әкімі Арман Бекбосынов айтты, деп хабарлайды F16.kz.
Аудан басшысының айтуынша, жылдан жылға ауқымы кеңейіп келе жатқан іс-шараның биылғысына қатысушы ретінде 140-тан астам адам қатыспақ. Ал фестивальді тамашалауға келетін қонақтардың саны 10 мыңнан кем болмауы керек.
– Былтырғы фестивальді 7 мыңға жуық адам көріп қайтқанын білетін боларсыздар. Ал биыл аталмыш көрсеткішті 10 мыңға жеткізуді көздеп отырмыз. Бұл межеге жету үшін қажетті үгіт-насихат жұмыстары жүргізілді. Фестивальге деген қызығушылық жоғары. Енді тек ауа райының бұзылмауын тілеп отырмыз, – деп хабарлады аудан әкімі А.Бекбосынов.
Жалпы, үш күнге созылатын биылғы фестиваль аясында спорттық сайыстардан бөлек, өзге де қызықты іс-шаралар өтетінін айта кеткен жөн. Мәселен, бүгін фестиваль қонақтары жыртқыш құсты қолға шақыру сияқты сайыстарды тамашалай алады. Сонымен қатар бұл жерде келушілер құрметіне жәрмеңке мен қолөнер бұйымдарының көрмесі де ұйымдастырылған. Бұл аумақта 37 киіз үйден тұратын этноауыл бой көтерген. Осы ретте облысымыздың әр аудан-қаласы екі киіз үйден тіккенін айту керек. Ал ортада облыстың бас киіз үйі тігіліп жатыр.
