Шығыс Қазақстан облысында туризм саласын түлететін төрт туристік кластерді дамытуға басымдық беріліп отыр, деп хабарлайды F16.kz.
Табиғаты тамаша шығыс өңіріне ат басын бұратын саяхатшылар қатары жылдан-жылға артып келеді. Мәселен, биыл шетелдік туристердің үлесі 5 пайызға өскен. Ал туризмге тартылған инвестиция көлемі биылғы жарты жылда 13 млрд теңгеге жетіп отыр.
Шығыс Қазақстан – еліміздің ең көрікті аймақтарының бірі және біз оны экономикалық ресурсқа айналдыру үшін қолдан келгеннің бәрін жасап жатырмыз. Өңір үшін бұл жаңа жұмыс орындарын құруға, инвестиция тартуға және облыстың оң имиджін қалыптастыруға мүмкіндік береді. Туризмде төрт кластерді дамытудың стратегиялық әлеуетін көріп отырмыз. Атап айтқанда, Катонқарағайдағы сауықтыру туризмі, Марқакөлдегі экотуризм, Риддердегі шаңғы туризмі, Өскеменде және көршілес Ұлан, Глубокое аудандарындағы демалыс туризмі, — деді Нұрымбет Сақтағанов.
Бүгінде тау туризмі мен спортшыларды дайындау орталығына айналатын Риддер маңында жыл бойы жұмыс істейтін «Анатау» кешенін салу жоспарланған.
Туризмге қаражат құюға жергілікті бизнес өкілдері қызығушылық білдіріп отыр. Бірақ шетелдік инвесторлармен де, атап айтқанда швейцариялық «Бартолет» компаниясымен келіссөздер жүргізіліп жатыр. Сонымен қатар қазіргі заманғы инфрақұрылым, яғни көлік қолжетімділігі, энергиямен жабдықтау, су ресурстары және байланыс болмай табысты туризмді дамыту мүмкін емес. Осы мәселелерді реттеуге де баса наза аударып отырмыз, — деді аймақ басшысы
