ШҚО-да республикалық маңызы бар Омбы – Майқапшағай бағытындағы трассаның салтанатты ашылуы өтті. Бүгін сегіз жыл жүргізілген құрылыс жұмыстары аяқталып, екі бірдей облыстың халқы асыға күткен жол ел игілігіне берілді, деп хабарлайды F16.kz тілшісі.
Республикалық трассаның ШҚО аумағынмен өтетін учаскесінің ашылуына облыс әкімі Нұрымбет Сақтағанов арнайы келіп қатысып, өңіріміздің қиыр шығысындағы Тарбағатай, Зайсан аудандарының, сондай көрші Абай облысындағы Жарма, Көкпекті, Ақсуат аудандарының халқын көптен күткен қуанышымен құттықтады.
– Бүгін Шығыс Қазақстан мен Абай облыстары үшін сән-салтанаты жарасқан ерекше күн. Сегіз жыл бойы жүргізілген, екі облыстың аумағымен өтетін Қалбатау – Майқапшағай учаскесінің ашылуының куәсі болып отырмыз. Бұл жол Омбы – Майқапшағай халықаралық трассаның бір бөлігі және Батыс Еуропа – Батыс Қытай дәлізінің бір буыны болып есептеледі. Осындай жұмысты атқарған мердігер компанияға, сондай-ақ Үкіметке, Көлік министрлігіне және «ҚазАвтоЖол» компаниясына үлкен алғысымызды білдіреміз, – деді облыс әкімі.
Айта кетейік, халықаралық Омбы – Майқапшағай трассасының ШҚО және Абай облыстары аумағындағы учаскесінің жалпы ұзындағы 415 шақырымға жетеді. Оның ішіндегі 231 шақырымы Шығыс Қазақстан облысының аумағымен өтеді. Белгілі болғандай, жоба аясында 7 көпір мен 223 су өткізу арнасы салынған.
Осы ретте құрылыс жұмыстарын «Синьсин құрылыс және дамыту Қытай компаниясы» ЖШС жүргізгенін айтқан жөн.
Қытай мен Ресейді жалғайтын бұл жол Шығыс Қазақстандағы шекаралық шалғай аудандардың әлеуметтік-экономикалық дамуына, сондай-ақ облыс пен еліміздің көлік-логистика саласының өркендеуіне зор ықпал ететіні сөзсіз.
