Өскеменнің көмір сататын орындарында ұзын-сонар кезек. Қаз—қатар тізілген жүк көліктерінің бейнежазбасы әлеуметтік желілерде таралды, деп хабарлайды F16.kz.
Қала әкімдігінің мәлімдеуінше, «Қаражыра» кенішінен көмір толық көлемде жеткізілмеуі себепті осындай жағдай туындап отыр.
— Қазір облыс орталығында тұрғындарға және заңды тұлғаларға көмір сататын бес арнайы орын жұмыс істеп тұр. Олардың негізгілері: «Сейком» ЖШС мен «Топливная компания Терминал» ЖШС. Бұл көмір сататын орындарда қазір кезек бар, оған себеп «Қаражыра» АҚ тарапынан көмір тиеген вагондардың толық жеткізілмеуі. Өскемен әкімдігі аталған компания басшылығымен келіссөздер жүргізіп, көмір тиеген вагондарының жеткізілуін арттыру жөнінде келісімге келді, – деді қалалық тұрғын үй-коммуналдық шаруашылық, жолаушылар көлігі және автомобиль жолдары бөлімі басшысының орынбасары Рашид Шерубаев.
Көмір сату орындарындағы ұзын-сонар кезектің пайда болуына тағы бір себеп – тұтынушылардың дәл осы кезде тым көбейіп кетуі. Әдеттегідей жаз бойы арқаны кеңге салып жүрген сатып алушылар күз түсіп, күн суытқанда көмір қоймаларына қарай ағылады. Содан барып кезек, кептеліс туындайды.
