Шығыс Қазақстан облысында бұқаралық спорт түрін дамыту бойынша жұмыстар жүргізіліп жатыр. Республика күні қарсаңында Ұлан ауданына қарасты Таврия ауылында дене шынықтыру-сауықтыру кешені ел игілігіне берілді, деп хабарлайды F16.kz.
Құрылысы ұзаққа созылған нысанның ашылуын ауыл тұрғындары көп күткен. Бұл кешендер ауылдық жерлерде өмір сапасын жақсарту, жастарды спортпен айналысуға тарту және денсаулық сақтау саласын дамытуға ықпал етері сөзсіз.
Биыл Таврия, Бозанбай және Катонқарағай ауылдарында дене шынықтыру-сауықтыру кешенін ашу жоспарланған. Бұл дене шынықтыру-сауықтыру кешені ауылға жаңа тыныс беріп, жаңа өмір салтының бастауына айналады деп сенеміз. Осындай нысандар ауыл жастарының денсаулығын нығайтып қана қоймай, олардың бойында табандылық пен жеңіске деген сенім қалыптастырады, — деді аймақ басшысы Нұрымбет Сақтағанов.
Жаңа спорт кешенінде футбол, волейбол, баскетбол сияқты спорт түрлерімен айналысуға болады. Замануи жаттығу залы да қарастырылған. Алдағы уақытта балалар мен жасөспірімдерге арналған секциялар ашылмақ.
