Жыл соңына дейін Ұлан ауданында 52 шақырым жол мен көше жөнделеді. Бұл туралы Шығыс Қазақстан облысының әкімі Нұрымбет Сақтағанов аудан халқымен кездесуде айтты, деп хабарлайды F16.kz.
Ұлан ауданының агроөнеркәсіп кешенінде, өнеркәсіпте және туризмде даму мүмкіндіктері зор. Ауданның 2029 жылға дейінгі даму жоспары бойынша 15,8 млрд теңге бюджет қаражатын және 357,9 млрд теңге жеке инвестиция тарту жоспарланған. Бүгінде жалпы құны 8,8 млрд теңге болатын жылу оқшаулағыш материалдар зауытының құрылысы жүргізіліп жатыр, — деді аймақ басшысы.
Кездесуде тұрғындар республикалық маңызы бар трассадан Митрофановка ауылына дейінгі жолды, сондай-ақ Пролетарка ауылының ішіндегі жолдарды жөндеу қажеттігін алға тартты.
Аудан әкімдігі Митрофановка ауылына кіреберіс жолды 484,9 млн теңгеге орташа жөндеуге, Пролетарка ауылының ішіндегі жолдарды 154 млн теңгеге жөндеуге сметалық құжаттама әзірледі. Бұл жұмыстарды келер жылы жүзеге асыру жоспарланған. Сондай-ақ халық бұған дейін Дұбығалы көліне апаратын жолдың сапасына шағымданған. Аталған көлдің туристік әлеуеті жоғары, бірақ Гагарино ауылы арқылы өтетін жолдың жоқтығы ішкі туризмнің дамуын шектеп, аймақтың инвестициялық тартымдылығын төмендетеді.
Мәселені шешу үшін Дұбығалы көліне апаратын жол аудандық маңызы бар жолдар тізіміне енгізілді, — деді Нұрымбет Сақтағанов.
Аймақ басшысымен кездесуде аудан жұртшылығы өздерін толғандырған басқа да сауалдарға жауап алды.
