Қазақстан таеквондодан 2027 жылғы Әлем чемпионатын өткізу орны ретінде ресми түрде таңдалды, деп хабарлайды F16.kz порталы olympic.kz сайтына сілтеме жасап.
Бұл шешім Қытайдың Уси қаласында өтіп жатқан Әлем чемпионаты аясында Дүниежүзілік таеквондо федерациясының (World Taekwondo) жиынында қабылданды.
– Дүниежүзілік федерацияға мүше елдердің өкілдері бірауыздан Қазақстанның кандидатурасын қолдады. Олар Астанада өткен халықаралық турнирлердің жоғары деңгейде ұйымдастырылғанын ерекше атап өтті, – деп жазады дерек көзі.
Бұл Қазақстан мен Орталық Азияда өткен алғашқы Әлем чемпионаты болмақ. Федерация турнирді Астанада ұйымдастыруды жоспарлап отыр.
Бүгінде Уси қаласындағы жаһандық додаға әлемнің 179 елінен 991 таеквондошы жиналғанын айту керек. 24-30 қазан аралығында өтетін биылғы Әлем біріншілігінде еліміздің намысын 16 таеквондошы қорғайды.
